კორონავირუსის პანდემიამ კატასტროფულად იმოქმედა კულტურის სფეროზე ევროპაში. ავიაინდუსტრიის შემდეგ დარგი ყველაზე მეტად დაზარალდა. მსოფლიოს ერთ-ერთი ყველაზე მსხვილი აუდიტორულო  კომპანიის „ერნსტ ენდ იანგის“ ექსპერტების დასკვნის თანახმად დარგში მოგების 30% საავტორო უფლებებზე მოდიოდა, კულტურის სფეროს დაწესებულებების დახურვისა და წარმოების შემცირების გამო მოგების ეს წილიც დაიკარგა. მათი თქმით, ეკონომიკური კრიზისის სავალალო შედეგები 2022 წლამდე გასტანს, რაც ნიშნავს, რომ ფინანსურ რე სურსს აღარავინ დააბანდებს სახელოვნებო პროექტეში. „ერნსტ ენდ იანგის“ კვლევის თანახმად საშემსრულებლო სფეროში შემოსავლების ოდენობამ 90 %-ით ხოლო სამუსიკო ბიზნესში 76%-ით იკლო.

ამერიკის შეერთებული შტატების პრეზიდენტ ჯო ბაიდენსა და რუსეთის პრეზიდენტ ვლადიმერ პუტინს შორის პირველი სატელეფონო საუბარი გამართა. თეთრი სახლის მიერ გავრცელებულ განცხადებაში აღნიშნულია, რომ პრეზიდენტმა ბაიდენმა ვლადიმერ პუტინს გარკვევით განუცხადა, რომ შეერთებული შტატები ეროვნული ინტერესების დასაცავად რუსეთის ქმედებების საპასუხოდ მტკიცედ იმოქმედებს.  საუბარი  შეეხო  ასევე, რუსეთის მიერ ავღანეთში ამერიკელი ჯარისკაცების ლიკვიდაციის სანაცვლოდ დაწესებულ ჯილდოსა და ალექსეი ნავალნის მოწამვლის საკითხებს. სატელეფონო საუბრის შესახებ ინფორმაციას კრემლის პრესსამსახურიც ავრცელებს, სადაც აღნიშნულია, რომ პრეზიდენტებმა შეიარაღების კონტროლის შესახებ ხელშეკრულების გახანგრძლივებაზე შეთანხმებას მიაღწიეს.

ევროკავშირი აცხადებს, რომ კორონავირუსის საწინააღმდეგო ვაქცინების ექსპორტთან დაკავშირებულ წესებს გაამკაცრებს, რისი მიზეზიც კომპანია AstraZeneca-ს ვაქცინის მიწოდებასთან დაკავშირებული პრობლემებია. ჯანდაცვის კომისარმა სტელა კირიაკიდესმა განაცხადა, რომ ევროკავშირი საკუთარი მოქალაქეების დასაცავად ყველა საჭირო ზომას მიიღებს. კირიაკიდესმა „ტვიტერში“ დაწერა, რომ ორშაბათს AstraZeneca- ს წარმომადგენლებთან გამართულმა მოლაპარაკებებმა „არასაკმარისი განმარტებებისა და სიცხადის გამო უკმაყოფილება გამოიწვია.“ მისივე თქმით, ევროკავშირმა "ვაქცინის მიწოდების დეტალური გეგმის" მიწოდება მოითხოვა და AstraZeneca- სთან შემდეგი შეხვედრა ოთხშაბათს გაიმართება. შეგახსენებთ, გასულ კვირას, AstraZeneca-მ ევროკავშირს განუცხადა, რომ წარმოებასთან დაკავშირებით წარმოქმნილი პრობლემების გამო, ბლოკში შემავალ ქვეყნებს ვაქცინის გათვალისწინებულზე ნაკლებ რაოდენობას მიაწვდიდა.

აშშ-ის პრეზიდენტმა, ჯო ბაიდენმა ხელი მოაწერა აღმასრულებელ განკარგულებას, რომლითაც ტრანსგენდერების ჯარში მსახურებაზე დონალდ ტრამპის მიერ დაწესებული აკრძალვა გააუქმა. აღმასრულებელი განკარგულების ხელმოწერის ცერემონია თეთრ სახლში გაიმართა და მას აშშ-ის თავდაცვის მდივანი, ლოიდ ოსტინი დაესწრო, რომელმაც განაცხადა, რომ ტრანსგენდერების ჯარში მსახურებაზე აკრძალვის გაუქმებას მხარს უჭერს. 2017 წლის 26 აგვისტოს დონალდ ტრამპმა ტრასგენდერებისთვის სამხედრო სამსახურის გავლაზე აკრძალვის ბრძანება გასცა. 2018 წლის მარტში  კი ტრამპმა ხელი მოაწერა მემორანდუმს, რომელიც აშშ-ის არმიაში ზოგიერთ ტრანსგენდერს მსახურებას კრძალავს.

დემოკრატებმა აშშ-ის სენატში ექსპრეზიდენტ დონალდ ტრამპის იმპიჩმენტის საკითხზე რეზოლუცია შეიტანეს. ბრალდების თანახმად, დონალდ ტრამპს მხარდამჭერების მიმართ წარმოთქმული სიტყვით 6 იანვრის ამბოხების სტიმულირებაში ედება ბრალი. პროცესი სავარაუდოდ  8 თებერვალს დაიწყება და სასამართლო განხილვის ფორმატში წარიმართება. აშშ-ის კონგრესის წარმომადგენელთა პალატამ დონალდ ტრამპს იმპიჩმენტი 13 იანვარს გამოუცხადა. ის პირველი პრეზიდენტია აშშ-ის ისტორიაში, რომელსაც იმპიჩმენტი ორჯერ გამოუცხადეს. დონალდ ტრამპის იმპიჩმენტს მხარი 10 რესპუბლიკელმა კონგრესმენმაც დაუჭირა. ტრამპის დამნაშავედ ცნობისთვის სენატორთა ორი-მესამედის ხმაა საჭირო. ეს კი იმას ნიშნავს, რომ მის წინააღმდეგ ხმა 17-მა რესპუბლიკელმა სენატორმაც უნდა მისცეს. იმ შემთხვევაში, თუკი ყოფილი პრეზიდენტის წინააღმდეგ გამამტყუნებელ განაჩენს გამოიტანენ, სენატორებს საშუალება მიეცემათ გამართონ მეორე კენჭისყრა და ტრამპს მომავალში მაღალი სახელმწიფო თანამდებობების დაკავების შესაძლებლობა აღუკვეთონ.

ნიდერლანდებში პანდემიით გამოწვეული მკაცრი შეზრუდვებისა და კომენდანტის საათის წინააღმდეგ მასობრივი საპროტესტო აქციები გაიმართა. ენდჰოვენში დემონსტრანტებთან შეტაკებისას პოლიციამ ხელკეტები, წყლის ჭავლი და ცრემლსადენი გაზი გამოიყენა. ამსტერდამში საპროტესტო აქციაში მონაწილეობისთვის სამართალდამცავებმა 100 ადამიანი დააკავეს. პოლიციის ინფორმაციით, არასანქცირებულ აქციაში მონაწილეობა 1500-მდე მანიფესტანტმა მიიღო. ამსტერდამის სამუზეუმო მოედანზე დემონსტრანტები პოლიციასთან შეტაკებისას ნაგვის ურნებს წვავდენენ. კომენდანტის საათი ნიდერლანდებში გასულ შაბათს დაწესდა და ის 9 თებერვლამდე გასტანს. გასული წლის დეკემბრიდან ქვეყანა პრაქტიკულად ტოტალური კარანტინის პირობებში ცხოვრობს.

აშშ-ის 45-ე პრეზიდენტის, დონალდ ტრამპის იმპიჩმენტის საკითხს აშშ-ის სენატში თებერვლის მეორე კვირაში განიხილავენ. მსჯელობა სავარაუდოდ 8 თებერვლიდან დაიწყება. ამის შესახებ განცხადება დემოკრატიული პარტიის ლიდერმა, ჩაკ შუმერმა გამოაცხადა. როგორც იუწყებიან, კონგრესი 25 იანვარს გადასცემს სენატს დოკუმენტს, რომელიც დონალდ ტრამპის წინააღმდეგ წაყენებულ ბრალდებას შეიცავს. დემოკრატები აცხადებენ, რომ ტრამპს იმპიჩმენტის პროცესისთვის მოსამზადებლად დროს მისცემენ. შეგახსენებთ, რომ აშშ-ის კონგრესის ქვედა პალატამ აშშ-ის 45-ე პრეზიდენტის იმპიჩმენტის შესახებ 13 იანვარს გამოაცხადა. ტრამპს 6 იანვარს კაპიტოლიუმზე თავდასხმის წაქეზებაში დასდეს ბრალი. იმისთვის, რომ ტრამპის იმპიჩმენტი შედგეს, 100-დან 67 სენატორის მხარდაჭერა არის საჭირო. ამჟამად სენატში 50 რესპუბლიკელი და 50 დემოკრატია. გადამწყვეტი ხმა კი ვიცე-პრეზიდენტ კამალა ჰარისს აქვს.

ჯანდაცვის მსოფლიო ორგანიზაციაში განაცხადეს, რომ კოვიდ-19 საწინააღმდეგო ვაქცინაცია, დაბალ და საშუალოშემოსავლიან სახელმწიფოებში, შესაძლოა თებერვლიდან დაიწყოს. როგორც ორგანიზაციის დირექტორმა განაცხადა, ვაქცინების მილიონობით დოზის მიწოდების მიზნით, ასტრაზენეკასა და ოქსფორდის წარმომადგენლებთან მოლაპარაკებები დაწყებულია და   მისი დასრულების შემდეგ  ღარიბი ქვეყნები დამატებით 150 მილიონ დოზას მიიღებენ. მისივე თქმით, ვაქცინების დისტრიბუცია ჯანდაცვის მსოფლიო ორგანიზაციის ინიციატივით, კოვაქსის ფარგლებში დაიწყება, რომელიც მიზნად კოვიდ-19 ვაქცინების ყველა ქვეყნისთვის ხელმისაწვდომობის უზრუნველყოფას ისახავს.

აშშ-ის სენატში რესპუბლიკელები ყოფილი პრეზიდენტის, დონალდ ტრამპის იმპიჩმენტის საქმეზე მოსმენების დაწყების გადადებას ითხოვენ. ტრამპის თანაპარტიელების განმარტებით, ეს ყოფილ პრეზიდენტს პროცესისთვის მომზადებისთვის დროს მისცემს. კერძოდ, სენატში რესპუბლიკელთა ლიდერმა, მიტჩ მაკკონელიმ წარმომადგენელთა პალატაში დემოკრატებს თხოვნით მიმართა, 28 იანვრამდე გადადონ იმპიჩმენტის მუხლის სენატისთვის გაგზავნა. ამგვარად, ყოფილ პრეზიდენტს პროცესისთვის მოსამზადებლად ვადა დამატებით ორი კვირა – 11 თებერვლამდე ექნება. აშშ-ის პრეზიდენტს, დონალდ ტრამპს კონგრესის წარმომადგენელთა პალატამ ამბოხისკენ წაქეზებისთვის ბრალი მას შემდეგ წაუყენა, რაც მისი მომხრეები კაპიტოლიუმში შტურმით შეიჭრნენ. იმის იუხედავად, რომ ტრამპი პრეზიდენტის თანამდებობას აღარ იკავებს, სენატში იმპიჩმენტის პროცესის გაგრძელება შესაძლებელია. ამასთან, სენატში შესაძლოა, გაიმართოს კენჭისყრა დონალდ ტრამპისთვის სახელმწიფო თანამდებობის დაკავების აკრძალვის საკითხზე.

აშშ-ის პრეზიდენტი ჯო ბაიდენი რუსეთთან დადებული სტრატეგიული შეიარაღების შეზღუდვის ახალი ხელშეკრულების 5 წლით გაგრძელებას შეეცდება, - შესაბამისი განცხადება თეთრი სახლის პრესსპიკერმა ჯენ ფსაკიმ გააკეთა. სტრატეგიული შეიარაღების შეზღუდვის ახალი ხელშეკრულება როგორც აშშ-ს, ასევე რუსეთს 1 550-ზე მეტი სტრატეგიული ბირთვული ქობინის განთავსებას უკრძალავს. ის ასევე სახმელეთო და წყალქვეშა რაკეტებისა და ბომბდამშენების განთავსების შეზღუდვასაც ითვალისწინებს. ხელშეკრულების მოქმედების ვადა 2021 წლის 5 თებერვალს იწურება, იმ შემთხვევაში, თუკი მხარეებმა მისი კიდევ ხუთი წლით გახანგრძლივების გადაწყვეტილება არ მიიღეს.

აშშ-ის პრეზიდენტმა ჯო ბაიდენმა კორონავირუსის პანდემიის წინააღმდეგ ბრძოლის გეგმა წარადგინა, რომელსაც მან „ომის პერიოდის ვალდებულება“ უწოდა. როგორც ჯო ბაიდენმა განაცხდა, ვირუსისგან უკვე 400 000 ამერიკელი გარდაიცვალა და ეს უფრო მეტია, ვიდრე მეორე მსოფლიო ომის დროს დაიღუპულ ადამიანთა რაოდენობა. მისივე თქმით, უახლოეს მომავალში ეპიდემიოლოგიური ვითარება გაუარესდება, თუმცა, საბოლოოდ, ქვეყანა პანდემიის დამარცხებას შეძლებს.  აღსანიშნავია, რომ პრეზიდენტმა კოვიდ 19-თან ბრძოლის გეგმის ფარგლებში 10 აღმასრულებელ განკარგულებას ხელი უკვე მოაწერა, რომლებიც, სხვა საკითხებთან ერთად, აშშ-ში ჩასულ საერთაშორისო მგზავრებს კორონავირუსზე ჩატარებული ტესტის უარყოფითი პასუხის წარდგენას და აშშ-ში ჩასვლის შემდეგ კარანტინის გავლას ავალდებულებს.

ამერიკის შეერთებულ შტატებში, ამ წუთებში საპრეზიდენტო ფიცს რიგით 46-ე და ქვეყნის ისტორიაში ყველაზე მხცოვანი პრეზიდენტი - ჯო ბაიდენი დებს. პანდემიის გამო უჩვეულოა თავად ინაუგურაციის ცერემონია, სარიტუალო ელემენტების სიმცირის გარდა, ვაშინგტონში პოლიციისა და ეროვნული გვარდიის დამატებითი დანაყოფებია განთავსებული. რაც შეეხება დონალდ ტრამპს, მან თეთრი სახლის ტერიტორია  მეუღლესთან, მელანია ტრამპთან ერთად შვეულმფრენით დატოვა და ფლორიდაში გაემგზავრა.

დონალდ ტრამპმა აშშ-ის პრეზიდენტობის ბოლო დღეს თავისი ყოფილი მრჩეველი სტივ ბენონი შეიწყალა.  შეწყალებულთა სია ჯერ არ გამოქვეყნებულა, თუმცა მედიის ცნობით, მათ შორის არიან რეპერები ლილ უეინი და კოდაკ ბლექი, რომლებიც იარაღის შეძენა-შენახვასთან დაკავშირებული დანაშაულისთვის იყვნენ გასამართლებული, ასევე დეტროიტის ყოფილი მერი კვამე კილპატრიკი, რომელიც კორუფციული ბრალდებების საფუძველზე 28-წლიან სასჯელს იხდიდა.

ამერიკის შეერთებულ შტატებში 46-ე პრეზიდენტის ინაუგურაციისთვის ემზადებიან. დღეს ჯო ბაიდენი და კამალა ჰარისი ფიცის დადების შემდეგ უფლებამოსლების შესრულებას ოფიციალურად შეუდგებიან. ცერემონია ვაშინგტონში უკიდურესად გამკაცრებული უსაფრთხოების ზომების პირობებში გაიმართება. 6 იანვარს კაპიტოლიუმის შტურმის შემდეგ დედაქალაქში პოლიციის დამატებითი ძალები და ეროვნული გვარდიის დანაყოფები განთავსდნენ. კორონავირუსის გამო, შეზღუდულია ინაუგურაციაზე დამსწრეთა რაოდენობა. დახურული იქნება ვაშინგტონის ეროვნული პარკი, სადაც აღიმართა 200 ათასი დროშა. ჯო ბაიდენის ინაუგურაციის ცერემონიალის ფარგლებში დაგეგმილი ღონისძიებების უმეტესობა ვირტუალურად ჩატარდება.

მთიან ყარაბაღში საომარი მოქმედებებისას 2855  აზერბაიჯანელი სამხედრო დაიღუპა,- ამის შესახებ ინფორმაციას აზერბაიჯანული მედია ქვეყნის თავდაცვის სამინისტროზე დაყრდნობით ავრცელებს. ამავე ინფორმაციის თანახმად, შეიარაღებული კონფლიქტის შედეგად 50 სამხედრო დაკარგულად ითვლება.

„პატრიარქ  ბართოლომეოსის მიერ პანდორას ყუთის გახსნამ, უკვე მოიტანა განხეთქილება კვიპროსის ეკლესიაში, ასევე დაიწყო დუღილი სხვა ადგილობრივ მართმადიდებელ ეკლესიებში“ - ამის შესახებ განცხადება რუსეთის საგარეო საქმეთა მინისტრმა, სერგეი ლავროვმა გააკეთა.

აშშ-ის კაპიტოლიუმის შენობაში, მოსალოდნელი საფრთხის გამო, საგანგებო მდგომარეობა გამოცხადდა. გადაწყვეტილება მას შემდეგ  იქნა მიღებული, რაც შენობის სიახლოვეს კვამლი შენიშნეს.საგანგებო მდგომარეობის გამოცხადების შემდეგ კაპიტოლიუმის შენობაში შესვლა ან გამოსვლა შეუძლებელია.

შეერთებული შტატები მკაცრად გმობს რუსეთის გადაწყვეტილებას ალექსეი ნავალნის დაკავებასთან დაკავშირებით, - ამის შესახებ აშშ-ის სახელმწიფო მდივნის მაიკ პომპეოს განცხადებაშია აღნიშნული. მაიკ პომპეო ხაზს უსვამს, რომ შეერთებული შტატები კრემლის კრიტიკოსის დაუყოვნებლივ და უპირობო გათავისუფლებას მოითხოვს. ალექსეი ნავალნის დაკავების გამო შეშფოთებას გამოხატავს საფრანგეთის საგარეო საქმეთა სამინისტროც.

აშშ-ისკენ მიმავალი მიგრანტთა ნაკადის შესაკავებლად გვატემალის უსაფრთხოების ძალებმა ცრემლსადენი გაზი და ჯოხები გამოიყენეს. 8 000-მდე მიგრანტი გვატემალაში 15 იანვრის შემდეგ შევიდა. მიგრანტთა უმრავლესობა ჰონდურასისა და ელ სალვადორის მოქალაქეა, რომლებიც ქვეყნიდან გაქცევის მიზეზად სიღარიბესა და ძალადობას ასახელებენ.

სენატორი ლინდსი გრემი აშშ-ის მოქმედი პრეზიდენტის, დონალდ ტრამპის იმპიჩმენტის მცდელობას პოლიტიკური შურისძიების არაკონსტიტუციურ აქტს უწოდებს. რესპუბლიკელმა სენატორმა დემოკრატების ლიდერს, ჩაკ შუმერს წერილი მისწერა და მოუწოდა, სენატში შესვლისთანავე იმპიჩმენტის მუხლზე უარი თქვან.

Twitter-მა აშშ-ის წარმომადგენელთა პალატის რესპუბლიკელი წევრის, მარჯორი ტეილორი გრინის ანგარიში დაბლოკა. კომპანიაში აცხადებენ, რომ ანგარიში დროებით დაიბლოკა, ამის მიზეზი კი ტეილორ გრინის მიერ Twitter-ის საჯარო პოლიტიკის მრავალჯერადი დარღვევა გახდა.

კორონავირუსის საწინააღმდეგო Pfizer/BioNTech-ის ვაქცინით აცრას ნორვეგიაში 23 ადამიანი ემსხვერპლა. ყველა მათგანი 80 წელს გადაშორებული იყო. როგორც ნორვეგიის წამლის სააგენტოს დასკვნაშია აღნიშნული, ვაქცინაციის შემდეგ მოხუცებულთა გარდაცვალების მიზეზი მათი თანმდევი დაავადებები გახდა, რამაც ვაქცინის უკუჩვენება გამოიწვია.

დონალდ ტრამპი ისტორიაში შევიდა.  ამერიკის შეერთებული შტატების კონგრესმა მოქმედი  პრეზიდენტის იმპიჩმენტს მხარი დაუჭირა. მას ბრალი ამბოხსა და წაქეზებაში ედება.  ეს ქვეყნის სახელმწიფოებრიობის მთელს ისტორიაში პირველი შემთხვევაა, როცა ქვეყნის ლიდერს ხელისუფლებიდან ჩამოშორების პროცედურა ორჯერ შეეხო.

კორონავირუსის პანდემიის გამო, სკოლების დახურვის შედეგი გამანადგურებელია, – ამის შესახებ გაერო-ს ბავშვთა ფონდის – იუნისეფ-ის აღმასრულებელმა დირექტორმა, ჰენრიეტა ფორემ განაცხადა. მისი თქმით, მსოფლიოში მოსწავლეთა მესამედს დისტანციურ სწავლებაზე ხელი არ მიუწვდება.

აშშ-ის წარმომადგენელთა პალატამ  რეზოლუცია დაამტკიცა, რომელიც მოქმედ ვიცე-პრეზიდენტს კონსტიტუციის 25-ე შესწორების ამოქმედებისა და პრეზიდენტ დონალდ ტრამპისთვის უფლებამოსილების შეწყვეტისკენ მოუწოდებს.